رحلة بدأت بإلهام من قصص رحالة حول العالم، وتحولت لاحقًا إلى أسلوب حياة ومغامرة مستمرة على أربع عجلات. بسيارة نيسان باترول بيك أب اشتراها بمبلغ بسيط وأعاد بناءها من الصفر، انطلق في رحلةتجاوزت الحدود والمسافات لتشمل أكثر من 19 دولة.
تابعو الفيديو التعريفي على سيارات: https://www.instagram.com/reel/DWyyq9cjAB9/
في هذا الحوار مع iQ Cars، يأخذنا غيث جيلاوي داخل قصته، من بداية الفكرة وحتى أصعب اللحظات التي واجهها على الطريق، والدروس التي صنعت منه ومن سيارته قصة ألهمت آلاف المتابعين.
1. بالبداية... شلون بدت فكرة السفر بالسيارة بدل السفر التقليدي؟
كنت أتابع اثنين من الرحالة في رحلة اسمها "الطريق الطويل للأسفل"، وكانت الرحلة من اسكتلندا إلى جنوب أفريقيا سنة 2005. من وقتها قلت لنفسي: يومًا ما راح أبدأ أسافر بالسيارة.
2. شنو قصة السيارة اللي اشتريتها بـ700 دولار؟ وهل كنت متوقع توصل لهالقيمة والشهرة؟
كنت أدور على نيسان باترول نسخة البيك أب تحديدًا، وكانت نادرة جدًا بالبحرين وما موجود منها إلا عدد قليل. بالصدفة حصلت هاي السيارة في مزرعة صديق إلي، وقررت أشتريها وأبنيها من الصفر.
بعد ما اشتغلت السيارة، كثير من أصدقائي قالوا لي: "بيعها، راح تتعبك ومشاكلها كثيرة وما راح تعيش". لكن بدل ما أبيعها، حولت الموضوع إلى تحدٍ وبدأت رحلة من البحرين إلى اليابان بسيارتي اللي سميتها "النس".
أما موضوع الشهرة، فكنت متوقع إلى حد ما إن السيارة راح تلفت الانتباه، لأن كثير ناس ما كانوا يتوقعون يشوفون نيسان بهذا الشكل أو بهذه الرحلات.
3. بعد 19 دولة، شنو أكثر لحظة حسّيت بيها إن هاي السيارة صارت جزء من هويتك؟
خلال فترة كورونا علقت في جورجيا لمدة شهر كامل. ما كنت أقدر أدخل فندق ولا أغادر البلد، وصارت "النس" وقتها كل شيء بالنسبة إلي: البيت، وسيلة النقل، والمكان اللي أعيش فيه بشكل يومي.
4. أكيد السيارة مرت بمواقف صعبة... شنو أصعب عطل أو موقف صار وياك بالطريق؟
في تركيا غيرت زيت القير والأكسل، لكن للأسف كانت النوعية رديئة جدًا، وهذا تسبب بخسارة المحرك والقير والأكسل.
لكن التحدي الحقيقي ما كان العطل نفسه، كان شلون أوصل السيارة وأعبر الحدود إلى العراق حتى أحصل قطع الغيار، لأن المحرك كان من GM وما كان متوفر بسهولة.
5. شلون كانت ردة فعل الناس لما يعرفون إنك تلف العالم بسيارة بسيطة بهذا السعر؟
كثير ناس ما يصدقون إن ممكن تبدأ بشيء بسيط جدًا، وبعدها يتحول إلى مشروع أو قصة كبيرة.
6. برأيك، شنو الشي اللي خلا هاي السيارة تتحول من مجرد وسيلة نقل إلى قصة ملهمة؟
التحدي نفسه، والوصول لأماكن جميلة، والأهم نقل هذه الفكرة للناس ومشاركة التجربة معهم.
7. أكثر دولة استمتعت بالقيادة بيها؟ وليش؟
روسيا كانت من أكثر الدول المميزة بالنسبة إلي. الطبيعة هناك جميلة جدًا، والطرق طويلة ووعرة، والظروف الجوية بحد ذاتها كانت تحديًا مستقلًا.
8. أكو حدود أو طريق حسّيت مستحيل تعبره بالسيارة؟
مو مستحيل، لكن أكو طرق أو أماكن ممكن توصل لمرحلة تهدد سلامتي أو سلامة الناس اللي يستخدمون نفس الطريق، أو حتى تنهي الرحلة بالكامل.
9. شلون تجهز سيارتك لرحلات طويلة بين دول ومناخات مختلفة؟
التجهيز يعتمد بشكل كامل على الوجهة والطقس. تجهيزات البرد تختلف عن تجهيزات الحر.
أما بالنسبة للحدود، من أهم الأشياء تعرف شنو المسموح والممنوع. بعض الدول تمنع دخول أشياء معينة مثل الخضار أو المعلبات أو حتى أنواع من الحبوب.
10. بعد كل هاي المسافات، شنو أهم مواصفات لازم تكون بأي سيارة سفر؟
أهم شيء يكون نظام التعليق قابل للتعديل والتحكم، حتى يوفر راحة بالطرق السريعة ويكون مناسب بنفس الوقت للطرق الوعرة.
11. إذا ترجع لأول يوم بدأت بيه الرحلة... شنو النصيحة اللي تعطيها لنفسك؟
تعرف على سيارتك بشكل كامل. اقرأ عنها وتعلم كل شيء يخصها، لأنه إذا توقفت في مكان بعيد لازم تعرف شلون تتعامل مع المشكلة بنفسك.
12. أكو لحظة فكرت تستسلم أو تنهي المشروع؟
بالعكس. كل مشكلة كانت تواجهني كانت تزيد حماسي وتخليني أريد أغامر أكثر.
13. شنو أكثر موقف إنساني أثر بيك خلال السفر؟
مرة صادفت شخص مغرز لمدة ستة أيام، وقدرت أساعده وأطلع سيارته. هاي من المواقف اللي تبقى عالقة بالذاكرة.
14. برأيك، ليش الناس ارتبطت بقصتك بهذا الشكل؟
لأن كل شيء كان عفوي وحقيقي. كنت أشارك المشاكل والتحديات وكل الأشياء اللي تصادفني بدون أي تعديل أو تصنع.
15. شكد السوشال ميديا ساعدتك توصل قصتك للناس؟
بشكل كبير جدًا. وصلت القصة لأشخاص من أستراليا وحتى أمريكا الجنوبية.
16. شنو أكثر سؤال ينطرح عليك دائمًا من المتابعين؟
أكثر سؤال هو: "ما تخاف؟"
وجوابي دائمًا: إذا ماكو خوف، ماكو متعة.
17. بعد ما وصلت قيمة السيارة لأكثر من 160 ألف دولار... تفكر تبيعها يومًا ما؟
صعب جدًا أستغني عنها بسبب الذكريات المرتبطة بيها.
18. إذا قررت تبدأ رحلة جديدة بسيارة ثانية... هل راح يكون عندها نفس المعنى؟
ممكن أسوي نسخة ثانية، لكن كل التعديلات الموجودة اليوم بالسيارة الحالية جاءت من تجارب طويلة. كنت أضيف أشياء وأشيل أشياء وأطور باستمرار إلى أن وصلت لنسخة تناسبني بالكامل.
19. شنو حلم غيث جيلاوي القادم؟
حاب أقطع طريق البامير لأنه بالنسبة إلي يمثل تحديًا حقيقيًا.
20. كلمة أخيرة لكل شخص يشوف أحلامه "مستحيلة" بسبب الإمكانيات البسيطة؟
ماكو شيء اسمه مستحيل. تقدر تلف العالم بإمكانيات بسيطة جدًا، وأحيانًا أبسط البدايات هي اللي تصنع أكبر القصص.
الخاتمة
قصة غيث جيلاوي مو مجرد رحلة سيارات أو عدد دول تم عبورها. هي قصة عن فكرة صغيرة تحولت إلى مشروع حياة، وعن سيارة أصبحت جزءًا من الهوية والذكريات والطريق.
ومن سيارة بـ700 دولار إلى آلاف الكيلومترات وعشرات الحدود، يمكن أهم رسالة من رحلته هي أن الإمكانيات البسيطة ما تحدد حجم أحلامك... القرار هو البداية دائمًا.
